TOShKENT, 25 dek — Sputnik. Yakuniga yetayotgan yilda Rossiya va Xitoy o‘rtasidagi siyosiy va strategik o‘zaro ishonch mustahkamlandi, ikki davlat o‘rtasidagi munosabatlar “qoyadek mustahkam”, dedi Xitoy tashqi ishlar vaziri Van I. Bu haqda RIA Novosti xabar berdi.
“Yil davomida Xitoy va Rossiya fundamental manfaatlarni himoya qilishda bir-birini qat’iy qo‘llab-quvvatladi, o‘zaro siyosiy va strategik ishonchimiz yanada mustahkamlandi”, - dedi u Xitoy diplomatiyasiga bag‘ishlangan simpoziumda so‘zlagan nutqida. Nutq matni Xitoy Tashqi ishlar vazirligi rasmiy saytida e’lon qilindi.
Van I 2022-yilda Rossiya va Xitoy o‘rtasida do‘stona va yaxshi qo‘shnichilik hamkorligi chuqurlashgani, keng qamrovli strategik hamkorlik “yana yetuk va mustahkam” bo‘lganini qo‘shimcha qildi.
Diplomatning ta’kidlashicha, Moskva va Pekin o‘rtasidagi munosabatlar hech qanday uchinchi tomonga qarshi emas, ular qo‘shilmaslik va qarama-qarshilik qilmaslik tamoyillariga asoslanadi.
“Bunday munosabatlar aralashish yoki ikki davlat o‘rtasida nizo chiqarishga urinishlardan xoli va xalqaro muhitdagi o‘zgarishlarga qarshi immunitetga ega”, - deydi u.
Xitoy TIV rahbari o‘z nutqida, shuningdek, Rossiya va Xitoy o‘zaro savdo hajmini 200 milliard dollarga yetkazish maqsadiga jadallik bilan yaqinlashayotganini ta’kidladi. Qo‘shma yirik investitsiya loyihalari izchil amalga oshirilib, milliy valyutalarda hisob-kitoblar ko‘lami kengaymoqda.
2022 yilda, Van Ining ta’kidlashicha, ikki mamlakatning transchegaraviy o‘zaro bog‘liqligi ham mustahkamlandi, bunga Xeyxe — Blagoveshensk avtomobil ko‘prigi va Tunszan – Nijneleninskoe temir yo‘l ko‘prigining ochilishi hissa qo‘shdi.
Avvalroq Xitoyning Rossiyadagi elchisi RIA Novosti agentligiga bergan intervyusida Rossiya va Xitoy o‘rtasidagi o‘zaro qo‘llov 2022-yilda kuchayganini, Pekin, unga ko‘ra, Ukraina masalasida xolis pozitsiyani egallab, bir tomonlama sanksiyalar qo‘llanilishiga qarshi chiqqanini ta’kidlagan edi.