TOShKENT, 22 dek — Sputnik. Rossiya bosh vaziri Mixail Mishustin 2023-yil boshida Markaziy Osiyoga safar qilishi mumkin, dedi Rossiya TIV huzuridagi MDH davlatlari uchinchi departamenti direktori Aleksandr Sternik. Bu haqda RIA Novosti xabar berdi.
“Keyingi yilning boshida hukumatimiz rahbarining mintaqaga tashrifi rejalashtirilgan, u yerda ham o‘zaro manfaatli shartnomalar, ham yangi yo‘nalishlar, xalqaro transport yo‘laklari haqida suhbat davom etadi”, - dedi u “Valday” munozara klubida.
Sternikning fikricha, Markaziy Osiyo davlatlari ham Rossiya, ham mintaqadagi boshqa yirik o‘yinchilar bilan teng huquqli munosabatlar o‘rnatishga intilmoqda.
“Rossiya va Markaziy Osiyo o‘rtasidagi munosabatlar bir yil avvalgidek faol emas, degan tezis bilan bahslashgan bo‘lardim. Quruq statistik ma’lumotlarni oladigan bo‘lsak ham, 2021-yilda oliy va yuqori darajadagi 57 ga yaqin tashrif, uchrashuv va muloqotlar bo‘lganiga e’tibor qaratishimiz mumkin. Bu yil qariyb 10 taga ko‘proq – 66 ta”, - deya qo‘shimcha qildi u.
Eslatib o‘tamiz, Rossiya hukumati rahbari Mixail Mishustin 1-2 dekabr kunlari amaliy tashrif bilan O‘zbekistonda bo‘ldi. O‘zbekiston bosh vaziri Abdulla Aripov bilan hukumat rahbarlari darajasidagi Qo‘shma komissiya yig‘ilishida ishtirok etdi. Shuningdek, u Samarqandda O‘zbekiston - Rossiya biznes-forumining yalpi majlisida so‘zga chiqdi.