TOShKENT, 19 dek — Sputnik. Qatarda futbol bo‘yicha jahon chempionatining final bahsi Argentina va Fransiya milliy jamoalari o‘rtasida bo‘lib o‘tdi.
Argentinaliklar o‘yinning 23 daqiqasiga kelib hisobni ochishga muvaffaq bo‘lishdi. Lionel Messi belgilangan penaltini aniq amalga oshira oldi.
36 daqiqada Anxel Di Mariya hisobni 2:0 ko‘rinishiga keltirdi.
Ikkinchi bo‘limning 79 daqiqasida Argentina darvozasiga 11 metrlik jarima zarbasi belgilandi. Kilian Mbappe uni golga aylantirdi va oradagi farqni qisqartirdi. Oradan bir zum o‘tmay Mbappe dubl qayd etdi. Natijada hisob 2:2 bo‘ldi. Bu bilan fransiyaliklarning so‘nayotgan umidi qayta porladi.
Kilian Mbappe
© Sputnik / Grigoriy Sisoyev
Hakam o‘yinga 8 daqiqa qo‘shib berdi. Bahs durang bilan yakunlandi. Shu bois g‘olibni aniqlash uchun qo‘shimcha 30 daqiqa tayinlandi.
108 daqiqada Messi Argentinani oldinga olib chiqdi. 116 daqiqada Argentina darvozasiga yana penalti tayinlandi. Mbappe uni osonlik bilan golga aylantirdi va jahon chempionatida xet trik muallifi bo‘ldi. Qo‘shimcha vaqtda hisob 3:3 bo‘lgani uchun navbat penaltilar seriyasiga keldi va unda Argentina ustun keldi.
Argentina jahon kubogini bunga qadar 1978 va 1986-yilda qo‘lga kiritgan edi. Bu g‘alaba bilan argentinaliklar uch karra jahon chempioni bo‘lishdi.