TOShKENT, 15 dek — Sputnik. Buxoro viloyati va Mo‘ynoq tumanidagi konlarda 5ta quduqni ishga qo‘shish natijasida kunlik tabiiy gaz qazib chiqarish hajmi 1,3 million kub metr oshirildi. Bu haqda "O‘zbekneftgaz" ma’lum qildi.
1-14 dekabr kunlari “O‘zbekneftgaz” AJ 4ta yangi quduqda burg‘ulash va yana 1ta quduqda mukammal ta’mirlash ishlarini yakunlagan. Buning natijasida kunlik gaz qazib chiqarish 1,3 mln kub metrga oshirildi.
Quyidagi konlarda tabiiy gaz qazib chiqarishga erishildi:
Muborak regionidagi “Yangi Alat” konidagi 2 va 3-sonli quduqlarida kunlik 600 ming kub metr;
Usturt regionidagi “Quyi Sharqiy Berdax” konidagi 4-,10 hamda “Quyi Surgil” konidagi 21-sonli quduqlarida kunlik 700 ming kub metr.
Ma’lumot uchun, “Yangi Alat” koni Buxoro viloyatining Olot tumanida joylashgan. “Quyi Sharqiy Berdax” va “Quyi Surgil” konlari o‘tgan yili yilda ochilgan bo‘lib, ular Qoraqalpog‘iston Respublikasining Mo‘ynoq tumanida joylashgan.