Avtobus-bog‘chalar, onlayn akademiya: MTV innovatsiyalar haqida ma’lumot berdi

TOShKENT, 14 dek — Sputnik. Maktabgacha ta’lim vazirligida 2022-yilda bajarilgan ishlar yuzasidan ochiq muloqot bo‘lib o‘tdi, deb xabar bermoqda Sputnik muxbiri.

"Biz joriy yilda maktabgacha ta’lim tizimida ko‘plab yangi loyihalarni amalga oshirdik. “Aqlvoy”, “S-board”, “Imkon”, Face ID kabi kreativ va innovatsion loyihalar ancha samarali kechdi. Ayniqsa, imkoniyati cheklangan bolalarni tarbiyalashda inklyuziv ta’limni yanada rivojlantirdik va mamlakatda 2000 dan ortiq imkoniyati cheklangan bolalarni qamrab oldik”, - dedi maktabgacha ta’lim vaziri Agreppina Shin.

Tizimda iklyuziv ta’limni rivojlantirishda oilaviy bog‘chalar ishga tushirilgan, ular xususiy sherikchilik va tadbirkorlik asosida faoliyat yuritadi.

Hozirda xususiy sektorda 140 ta nodavlat maktabgacha ta’lim muassasalari, 1700 ta oilaviy bog‘chalar faoliyat olib bormoqda.

Maktabgacha ta’lim vazirligi qator davlatlar, jumladan, Janubiy Koreya, Rossiya, Turkiya, Belarus davlatlari hamda UNICEF, UNESCO va “Rossotrudnichestvo” kabi xalqaro institut va tashkilotlar bilan hamkorlikni yo‘lga qo‘ygan.

Respublikada joriy yilda qator yirik innovatsion loyihalar amalga oshirilgan. Xususan, "Bolalik академияси"(www.bolakadem.uz)- raqamli platformasi yaratilgan.

Raqamli platforma uzluksiz ta’limni qo‘llab-quvvatlash, an’anaviy ta’lim tizimlariga raqamli texnologiyalarni joriy etish, O‘zbekiston maktabgacha ta’lim sohasidagi pedagoglar va mutaxassislarga, shuningdek, ota-onalar va maktabgacha yoshdagi bolalarga yordam berish uchun mo‘ljallangan bo‘lib mazmuniy jihatdan takomillashtirilib borilmoqda.

Albert va Genibot robotlari 6 yoshdan katta tarbiyalanuvchilarga mo‘ljallangan. Birinchi bosqichda bola tayyor kodlash kartalari yordamida o‘yinchoqni harakatlanishga, ko‘zini miltiratishga, gapirishga majbur qiladi.

Shu tarzda u kod bloklarining qanday ishlashini tushunib oladi. Yoshi kattaroq bolalar robotni smartfonga ulab, o‘z buyruqlari va algoritmlarini yaratishlari mumkin.

O‘zbekistonning maktabgacha ta’lim tashkilotlariga janubiy koreyalik hamkorlar 275 ta Albert va Genibot aqlli robotlari, shu jumladan bolalarga robototexnika va dasturlash ko‘nikmalarini o‘rgatishga mo‘ljallangan 350 ta o‘quv qo‘llanma taqdim etishgan.

"Aqlvoy" mobil bog‘chalari maktabgacha ta’lim tashkilotlari bo‘lmagan chekka hududlardagi bolalarga bepul xizmat ko‘rsatadi.

Ular uzoq, borish qiyin bo‘lgan hududlarda istiqomat qiluvchi bolalarga maktabgacha ta’lim xizmatini ko‘rsatishga mo‘ljallangan.

"Aqlvoy" avtobuslari quyosh batareyasi, konditsioner, hojatxona, issiq-sovuq suv, tamaddilarni isitish uchun joy kabi qulayliklarga ega.

Mobil bog‘chalarda hamshira yo‘qligi bois tarbiyachilar zaruriy tibbiy bilim va ko‘nikmalar bo‘yicha tayyorgarlikdan o‘tgan.