TOShKENT, 6 dek — Sputnik. O‘zbekiston prezidenti Shavkat Mirziyoyev Turkiya bilan harbiy doiradagi bitimni ratifikatsiya qilish to‘g‘risidagi qonunni imzoladi. Hujjat bugun, 6-dekabr kuni e’lon qilindi, deb xabar berdi RIA Novosti “Xalq so‘zi” gazetasiga tayanib.
Ratifikatsiya qilish to‘g‘risidagi qonun Oliy Majlisning Qonunchilik palatasi tomonidan qabul qilingan va noyabr oyida O‘zbekiston parlamenti Senati tomonidan ma’qullangan edi.
“O‘zbekiston Respublikasi hukumati va Turkiya Respublikasi hukumati o‘rtasidagi harbiy hadli bitim ratifikatsiya qilinsin”, - deyiladi qonun matnida.
Kelishuv 29-mart kuni Turkiya prezidenti Rajab Toyyib Erdog‘anning O‘zbekistonga tashrifi chog‘ida imzolangan edi.
Avvalroq Senat matbuot xizmati mazkur hujjat O‘zbekiston va Turkiya o‘rtasida harbiy tayyorgarlik va ta’lim, mudofaa sanoati hamkorligi, logistika, kartografiya va gidrografiya sohasidagi hamkorlikni yanada rivojlantirish, minalar va qo‘lbola portlovchi qurilmalarga qarshi kurashish bo‘yicha tajriba almashishni nazarda tutayotgani haqida xabar bergan edi.