TOShKENT, 12 noya — Sputnik. Bugun Xitoyning "Tanchjou-5" yuk tashuvchi kosmik kemasi kosmodromdan uchirilganidan ikki soatdan ko‘proq vaqt o‘tib orbital stansiyaga tutashdi va jahon rekordini o‘rnatdi. Bu haqida Xitoyning boshqariladigan parvozlar dasturi ma’muriyati ma’lum qildi, deya xabar berdi RIA Novosti.
12 noyabr kuni Pekin vaqti bilan soat 10.03 da "Tanchjou-5" yuk kosmik kemasi bilan "Chanchjen-7-Y6" tashuvchi raketasi Xaynan orolidagi Venchang kosmodromidan parvozni boshladi. Pekin vaqti bilan soat 12.10da yuk tashuvchi Tangun kosmik stansiyasining Tanxe asosiy moduli portiga tutashdi.
“Ushbu missiya ikki soat ichida avtonom tezkor yaqinlashish va birlashishga erishib, jahon rekordini o‘rnatgan birinchi missiya bo‘ldi”, deyiladi agentlik bayonotida.
Ta’kidlanishicha, ushbu texnologik yutuq Xitoy kosmik kemalarining orbitaga qo‘shilish darajasini oshirish, shuningdek, favqulodda vaziyatlarda kosmik stansiyani ta’minlash imkoniyatlarini oshirishda katta ahamiyatga ega.
Yaqinlashish va o‘rnatishni boshqarish strategiyasini optimallashtirish natijasida “Tanchjou-5” stansiyaga may oyida Tangunga yuborilgan “Tanchjou-4”ga qaraganda deyarli uch baravar tezroq tutashdi. U ishga tushirilgandan so‘ng o‘rnatish tugaguniga qadar taxminan 6,5 soat vaqt o‘tdi.
Yuk tashuvchi stansiyaga yil oxirigacha borishi kerak bo‘lgan Shenchjou-15 kosmik kemasining uchta kosmonavti uchun olti oylik qolish va orbitada ishlash uchun zarur bo‘lgan sarf materiallari, yoqilg‘i va jihozlarni yetkazib berdi.
Stansiyaning umumiy yashash maydoni taxminan 110 kubometrga yetadi, u bir vaqtning o‘zida uchta kosmonavtni yoki ekipaj almashinuvi paytida olti kishini sig‘dira oladi.