TOShKENT, 11 noya — Sputnik. Elektr energiyasi uzluksizligini ta’minlash maqsadida barcha shifoxonalarda qo‘shimcha dizel generatorlari o‘rnatilgan. Bu haqida Energetika vazirligi xabar berdi.
Aytilishicha, ijtimoiy tarmoqlarda “Vodiydagi shifoxonalarda ham svet o‘chib qolmoqda” mazmunida xabar e’lon qilindi.
9 noyabr kuni soat 19:47dan 20:00ga qadar Namangan viloyat Yuqumli kasalliklar va soat 20:25dan 20:45ga qadar Chust tuman markaziy shifoxonalarini elektr energiyasi bilan ta’minlovchi tarmoqlarda nosozlik yuzaga kelib uzilish kuzatilgan.
Shu vaqt oralig‘ida, qisqa fursatda shifoxonalarning zaxira dizel generatorlari ishga tushirilib, muassasalarda elektr ta’minoti qayta tiklangan.
“Sog‘liqni saqlash vazirligi tomonidan barcha shifoxonalar qo‘shimcha dizel generatorlari bilan ta’minlangan bo‘lib, tibbiyot muassasalariga elektr ta’minoti barqaror yetkazib berilmoqda”, deyiladi xabarda.
Eslatib o‘tamiz, avvalroq Energetika vazirligi Farg‘ona vodiysining ayrim hududlarida elektr ta’minotida qisqa muddatli uzilishlar kuzatilayotganini ma’lum qilgandi.
Qayd etilishicha, energetika tizimining barqaror ishlarishini ta’minlash va tizimda yuzaga kelishi mumkin bo‘lgan katta avariyalar hamda uzilishlarni oldini olish maqsadida vodiy viloyatlarining ayrim hududlarida elektr ta’minotida qisqa muddatli cheklovlar kiritishga majbur bo‘linmoqda.