TOShKENT, 29 okt — Sputnik. Samarqandda bo‘lib o‘tgan Mustaqil davlatlar hamdo‘stligi Parlamentlararo Assambleyasining kuzgi sessiyasida Hamdo‘stlik mamlakatlari parlamentariylariga MDH mukofotlari topshirildi.
Mazkur medal ishtirokchilarga parlamentarizmni rivojlantirish va mustahkamlashdagi xizmatlari, Mustaqil Davlatlar Hamdo‘stligi faoliyatining huquqiy asoslarini rivojlantirish va takomillashtirish, xalqaro munosabatlar va parlamentlararo hamkorlikni mustahkamlashga qo‘shgan hissasi uchun berildi.
Ma’lumot uchun, MDH PA 54-yalpi majlisida 40 ta namunaviy hujjat qabul qilindi. Shuningdek, ishtirokchilari saylovga oid bir qator namunaviy hujjatlarni ko‘rib chiqishdi.
Bundan tashqari, xavfsizlik, iqtisodiy rivojlanish, davlat qurilishi, ta’lim, madaniyat, axborot va boshqa muhim sohalarga oid qonun loyihalar muhokama etildi.
Qolaversa, 2023-2025 yillarga mo‘ljallangan Hamdo‘stlikda namunaviy qonun ijodkorligi rejalari haqida ma’lumot berildi.
Eslatib o‘tamiz, avvalroq Kengash tuzilganligining 30-yilligi munosabati bilan o‘zbekistonlik senatorlar, deputatlar hamda vazirlik va idoralar vakillariga yubiley medallari va esdalik nishonlari topshirilgan edi.