TOShKENT, 25 okt — Sputnik. O‘zbekistondagi umumta’lim maktablariga quyosh elektr panellarini o‘rnatish ishlari boshlandi. Bu haqida Xalq ta’limi vazirligi xabar berdi.
Vazirlik 390 ta umumta’lim maktabiga quyosh elektr panellarini o‘rnatadi. Mahalliy hokimliklar esa 610 ta maktab binosiga quyosh elektr panellari o‘rnatadi.
Quyosh elektr panellari kamida 5-10 kVt quvvatga ega bo‘lishi kerak. Bugungi kunga qadar Andijon, Navoiy, Sirdaryo, Farg‘ona hamda Toshkent viloyatlaridagi maktablarda mazkur turdagi quyosh elektr panellarini o‘rnatish ishlari amalga oshirilmoqda.
Hozirda Toshkent viloyatidagi 21 ta umumta’lim maktabida quyosh panellari o‘rnatilmoqda.
quyosh elektr panellari
© Xalq ta’limi vazirligi
Eslatib o‘tamiz, prezident topshirig‘i bilan yil yakuniga qadar 2 107 ta bog‘chada, 1 ming maktabda quyosh elektr panellari va suv isitish qurilmalari o‘rnatilishi ko‘zda tutilgan.
Shuningdek, shu yilning o‘zida barcha oliygohlarda quyosh elektr uskunalari o‘rnatiladi.
Mendeleyev nomidagi kimyo-texnologiya universitetida 100 kilovatt quvvatli quyosh elektr uskunasi o‘rnatilgan. U yerda yiliga 200 ming kilovatt soat elektr energiyasi ishlab chiqarilmoqda. Hozirda 36 ta suv isitish qurilmasini o‘rnatish hisobiga yiliga 4,2 million kilovatt soat yoki qariyb 2 milliard so‘mlik elektr energiyasi tejalmoqda.