TOShKENT, 24 okt — Sputnik. AQSh prezidenti Jo Bayden MSNBC telekanaliga bergan intervyusida Amerika jamoatchiligi keyingi saylovlar oldidan uning salomatligi xususida xavotir bildirishga haqli ekanini tan oldi.
“Hukm chiqarishning eng yaxshi usuli - meni kuzatish. Men sekinlashapmanmi? Oldingi sur’atimni yo‘qotapmanmi? Ertaga kasal bo‘lishim mumkin, ertaga o‘lishim mumkin”, - dedi Bayden intervyuda.
Avvalroq Amerika prezidenti ikkinchi muddatga saylanish niyatida ekanini, biroq hali yakuniy qarorga kelmaganini aytgandi. O‘tgan hafta u noyabr oyida bo‘lib o‘tadigan Kongress saylovlaridan so‘ng qayta saylanish to‘g‘risida qaror qabul qilish niyatida ekanligini aytdi va AQShning sobiq prezidenti Donald Tramp nomzodini qo‘yishga qaror qilsa, uni yana mag‘lub etishiga ishonch bildirdi.
Bu yil 80 yoshga to‘ladigan Bayden Qo‘shma Shtatlarning tarixdagi eng keksa prezidentiga aylandi. U muntazam ravishda kulgili vaziyatlarga tushib qoladi.