Qashqadaryo va Vitebsk 3 million dollarlik shartnomalar imzoladi

TOShKENT, 18 okt — Sputnik. Belarusning Vitebsk viloyati delegatsiyasi Qashqadaryo viloyati bilan hamkorlik bo‘yicha qator shartnomalar imzoladi. Bu haqda BelTA xabar berdi.

Qayd etilishicha, Belarus delegatsiyasi 10-13 oktabr kunlari Qashqadaryoda bo‘lgan va ishchi safari chog‘ida tomonlar Belarus tovarlarini O‘zbekiston bozoriga yetkazib berish masalalarini muhokama qilgan.

Vitebsk viloyat ijroiya qo‘mitasi ma’lumotlariga ko‘ra, go‘sht va sut mahsulotlari, elektr jihozlari va kabel mahsulotlari O‘zbekiston tomonida alohida qiziqish uyg‘otgan.

Yig‘ilishda imzolangan import-eksport shartnomalari hajmi 3 million dollarni tashkil etgan. Bunga neft sanoati uchun mahsulotlar, o‘lchov asboblari va uskunalari kiradi.

Xabarga ko‘ra, O‘zbekiston tomoni ushbu mahsulotlarni ishlab chiqarishni tashkil etishda Belarus tajribasidan foydalanish niyatida. Misol uchun, sut sanoatida malakali mutaxassislar yetishmayapti — ular bu bo‘shliqni Belarus universitetlari ishtirokida to‘ldirishni rejalashtirmoqda.

“Biz uchun O‘zbekiston Osiyoga chiqish imkoniyatiga ega bo‘lgan juda qiziq mamlakat”, - dedi mintaqa hukumati rahbari o‘rinbosari Anjelika Nikitina. Uning so‘zlariga ko‘ra, kelgusida hamkorlik rejalari yagona yo‘l xaritasida birlashtiriladi.

Nashr ma’lumotlariga ko‘ra, Vitebsk viloyati va O‘zbekiston o‘rtasidagi tovar ayirboshlash hajmi 2022-yilning sakkiz oyida 17 million dollarni tashkil etib, o‘tgan yilga nisbatan ikki baravarga oshgan. Shundan 12,1 million dollari Belarus eksporti hissasiga to‘g‘ri keladi.

Vitebskdan O‘zbekiston bozoriga yetkazib berilayotgan mahsulotlarning qariyb yarmini dori vositalari, go‘sht, quruq sut, bolalar ovqatlari, poliyetilen tashkil etadi. Qarama-qarshi yo‘nalishda, asosan, meva va sabzavotlar, shuningdek, iplar va mis simlar eksport qilinadi.