TOShKENT, 12 okt — Sputnik. Ijarada turadigan 1-kurs talabalariga 2 oylik ijara kompensatsiyasi hech qanday shartnomasiz to‘lab beriladi. Bu haqida Yoshlar ishlari agentligi direktori Alisher Sadullayev ma’lum qildi.
Qayd etilishicha, ijarada yashaydigan 1-kurs talabalariga, istisno tariqasida, sentabr va oktabr oyi ijara to‘lovlarining 50 foizi to‘lab beriladi.
Toshkent shahrida BHMning 1 baravarigacha (hozirda 300 ming so‘m);
Qolgan hududlarda esa BHMning 0,5 baravarigacha (hozirda 150 ming so‘m).
Ijara shartnomasini taqdim etgan talabalarga noyabr oyidan to‘lovlar davom ettiriladi.
“Mazkur imkoniyatdan foydalanish uchun ijarada turadigan talabalar o‘zi ta’lim olayotgan fakultetning yoshlar bilan ishlash bo‘yicha dekan o‘rinbosari yoki oliy ta’lim muassasasining talabalarni turar joy bilan ta’minlash ishlarini muvofiqlashtiruvchi bo‘limiga murojaat qilishlari mumkin”, deydi Alisher Sadullayev.
Ma’lumot uchun, Hukumatning tegishli qaroriga ko‘ra, o‘tgan yil 1-maydan boshlab yotoqxona bilan qamrab olinmagan va o‘ziga, shu jumladan, ota-onasiga tegishli bo‘lmagan uyda ijarada yashaydigan talabalarga ular tomonidan to‘lanadigan oylik ijara to‘lovining 50 foizi davlat hisobidan qoplab berilishi belgilangandi.