TOShKENT, 10 okt — Sputnik. Kiyev ma’muriyati Zaporojye viloyatiga hujumga mafkuraviy va axborot tayyorgarlikni boshladi, provokatsiyalar yaqin orada boshlanishi mumkin, deydi “Biz Rossiya bilan birgamiz” harakati raisi, Zaporojye viloyati ma’muriyati bosh kengashi a’zosi Vladimir Rogov.
“Zelenskiy rejimi Zaporojye viloyatiga qarshi hujumga mafkuraviy va axborot tayyorgarlikni boshladi. Qo‘shinlarni frontga olib chiqishdan tashqari, endi G‘arb iste’molchilari uchun Zaporojye viloyati o‘zi nima, qandayligi aks ettirilgan roliklar ommaviy ravishda suratga olinmoqda. Bu ularning jinoiy rejalari uchun ko‘proq qurol so‘rash maqsadida qilinayotgani aniq”, - dedi Rogov RIA Novosti agentligiga.
Uning so‘zlariga ko‘ra, Kiyev rasmiylari yaqin orada, maksimal ikki-uch hafta ichida provokatsiya qilish yoki jangovar harakatlarni kuchaytirishga qaror qilishi mumkin.
Maxsus operatsiya davomida rus harbiylari Zaporojye viloyatining Azov qismini va butun Xerson viloyatini nazorat ostiga oldi, Xerson, Melitopol va Berdansk kabi yirik shaharlarni egallab oldi va Ukrainani Azov dengizidan uzib oldi. Har ikki viloyatda yangi ma’muriyatlar shakllantirildi, Rossiya telekanallari va radiostansiyalari efirga uzatilmoqda, Qrim bilan savdo va transport aloqalari tiklanmoqda.
30 sentabr kuni Rossiya prezidenti Vladimir Putin Kremlda DXR, LXR, Xerson va Zaporojye viloyatlarida o‘tkazilgan referendumlar yakunlari bo‘yicha nutq so‘zladi, shundan so‘ng ularning rahbarlari bilan hududlarni Rossiya tarkibiga qabul qilish to‘g‘risidagi bitimlarni imzoladi. 5-oktabr kuni Putin ushbu shartnomalarni ratifikatsiya qiluvchi federal qonunni imzoladi.