TOShKENT, 26 sen — Sputnik. Xerson viloyatining Rossiya Federatsiyasi tarkibiga kirishi bo‘yicha referendum allaqachon bo‘lib o‘tgan deb topildi, chunki umumiy ishtirok 50 foizdan oshdi. Bu haqda viloyat saylov komissiyasi raisi Marina Zaxarova jurnalistlarga ma’lum qildi.
“Biz ishonch bilan aytishimiz mumkinki, referendum bo‘lib o‘tdi, chunki saylovchilarning ishtiroki 50 foizdan oshdi”, deydi u.
Uning aniqlik kiritishicha, Xerson viloyatida referendumning to‘rtinchi kuni o‘z vaqtida boshlangan.
Bundan tashqari, uning ta’kidlashicha, o‘tgan kun davomida Rossiyadagi saylov uchastkalarida 8,6 mingdan ortiq saylovchi ovoz bergan. Umuman olganda, referendum boshlanganidan beri Xerson viloyatining 25 mingdan ortiq aholisi Rossiya Federatsiyasidagi saylov uchastkalarida ovoz bergan.
23-27 sentabr kunlari Donesk va Lugansk xalq respublikalari, shuningdek, Zaporojye va Xerson viloyatlarida Rossiya tarkibiga qo‘shilish masalasi bo‘yicha referendum o‘tkazilmoqda.
19 sentabr kuni DXR va LXR Jamoat palatalari respublikalar rahbarlari Denis Pushilin va Leonid Pasechnikka Rossiya tarkibiga qo‘shilish bo‘yicha zudlik bilan referendum o‘tkazish tashabbusi bilan murojaat qildi. Ertasi kuni DXR va LXR rasmiylari referendum 23-27 sentabr kunlari bo‘lib o‘tishini e’lon qildi. Shuningdek, 20-sentabr kuni Xerson va Zaporojye viloyatlari ma’muriyati referendumlarni xuddi shu sanalarda o‘tkazish rejasini e’lon qildi. Rossiya prezidenti Vladimir Putin Rossiya referendum qarorlarini qo‘llab-quvvatlashini aytdi. Respublikalar va viloyatlar vakillarining fikricha, Rossiyaga qo‘shilish ularning hududlari xavfsizligini ta’minlaydi va tarixiy adolatni tiklaydi.