TOShKENT, 23 sen - Sputnik. Rossiya tashqi ishlar vaziri Sergey Lavrov va BMT Bosh kotibi Antoniu Guterrish BMT Bosh assambleyasi doirasida bo‘lib o‘tgan uchrashuvda oziq-ovqat mahsuloti bo‘yicha kelishuvning amalga oshirilishini muhokama qildi, uni to‘liq amalga oshirish zarurati tasdiqlandi. Bu haqda Rossiya TIV xabar berdi.
“Qora dengiz portlaridan Ukraina oziq-ovqat mahsulotlarini eksport qilish va Rossiya qishloq xo‘jaligi mahsulotlari va o‘g‘itlarini to‘siqlarsiz eksport qilish bo‘yicha Istanbul kelishuvlarini amalga oshirishning borishi batafsil muhokama qilindi. Tomonlar ularning to‘liq bajarilishini ta’minlash zarurligini tasdiqladi”, deyiladi uchrashuvdan so‘ng berilgan bayonotda.
Bundan tashqari, Lavrov va Guterrish Rossiya va BMTning o‘zaro hamkorligi, tashkilot va uning kotibiyati faoliyati samaradorligini oshirish bo‘yicha aniq tashabbuslarni muhokama qilgan.
“Faoliyati uning nizom maqsadlari va tamoyillariga, jumladan, barcha a’zo davlatlarning suveren tengligiga qat’iy asoslanishi kerak bo‘lgan jahon tashkilotining markaziy muvofiqlashtiruvchi rolini saqlab qolish bo‘yicha o‘zaro majburiyat yana bir bor tasdiqlandi”, deya qo‘shimcha qildi Rossiya TIV.
22 iyul kuni Istanbulda Rossiya mahsulotlarini eksportga yetkazib berishdagi cheklovlarni bekor qilish va Ukraina donini eksport qilishda Rossiyaning yordami bo‘yicha ko‘p tomonlama bitimlar imzolandi. Rossiya, Turkiya, Ukraina va BMT vakillari tomonidan imzolangan kelishuv Ukraina g‘allasi, oziq-ovqat va o‘g‘itlarini Qora dengiz orqali uchta portdan, jumladan Odessadan eksport qilishni nazarda tutadi.