TOShKENT, 22 sen — Sputnik. Sentabr oyidagi FIFA kunlari oldidan Transfermarkt portali 2022-yil terma jamoada eng ko‘p gol urgan futbolchilar ro‘yxatini taqdim etdi.
Unga ko‘ra O‘zbekiston terma jamoasi va Italiyaning “Roma” klubi hujumchisi Eldor Shomurodov ro‘yxatda peshqadamlik qilmoqda. O‘zbekistonlik futbolchi hisobida 2022-yilda 9 ta gol mavjud.
2022 yil terma jamoada eng ko‘p gol urgan futbolchilar
© Foto: Transfermarkt
Shu tariqa, Shomurodov Erling Holand, Sadio Mane, Lionel Messi kabi jahon yulduzlarini ortda qoldirgan.
Qayd etish joizki, Eldor Shomurodov 2023-yil Osiyo kubogining saralash bosqichi doirasida Maldiv orollariga qarshi o‘yinda, Navruz Cup-2022 musobaqasining Ugandaga qarshi kechgan final bahsida xet-trik rasmiylashtirgan edi. Bundan tashqari, u Janubiy Sudan bilan o‘rtoqlik uchrashuvda dublga mualliflik qilgan edi.
Eslatib o‘tamiz, Eldor Shomurodov o‘tgan yili O‘zbekistonda yilning eng yaxshi futbolchisi deb topilgan edi.