TOShKENT, 20 sen — Sputnik. Xerson viloyati hokimiyati bugun Rossiyaga qo‘shilish bo‘yicha referendum o‘tkazish masalasiga doir bayonot beradi. Bu haqda viloyat harbiy-fuqarolik ma’muriyati rahbari o‘rinbosari Kirill Stremousov ma’lum qildi.
“O‘ylaymanki, bugun, 20-sentabr kuni biz zudlik bilan hamma kutayotgan fakt yuzasidan bayonot beramiz”, dedi siyosatchi.
Kecha, 19-sentabr kuni LXR va DXR jamoat palatalari respublikalar rahbarlari Leonid Pasechnik va Denis Pushilinga hududlarni Rossiyaning bir qismi sifatida tan olish bo‘yicha zudlik bilan referendum o‘tkazish tashabbusi bilan murojaat qildi. DXR va LXR tezkor tartibda referendumga tayyorlanmoqda. Ular buni mavjud siyosiy vaziyatdan chiqishni va harbiy harakatlarni to‘xtatishning eng tez uslubi deb tushunishmoqda.
Stremousovning so‘zlariga ko‘ra, shundan so‘ng viloyat aholisi Xerson viloyatida ham xuddi shunday ovoz berish haqida so‘rab unga murojaat qilgan.
Maxsus operatsiya davomida Rossiya harbiylari Xerson va Zaporojye viloyatining Azov dengiziga tutash qismini nazoratga oldi, Xerson, Melitopol va Berdansk kabi yirik shaharlarni ozod qildi. Har ikki viloyatda yangi ma’muriyatlar shakllantirildi, Rossiya telekanallari va radiostansiyalari efirga uzatilmoqda, Qrim bilan savdo va transport aloqalari tiklanmoqda. Viloyatlar Rossiya tarkibiga kirish rejalarini e’lon qildi. Bundan tashqari, sakkiz yil o‘tgach, Shimoliy Qrim kanali blokdan chiqarildi.