TOShKENT, 17 sen — Sputnik. Samarqand davlat universiteti rektori Osiyo universitetlari assotsiatsiyasi prezidentligiga saylandi.
“Oltoy – Osiyo” V xalqaro ta’lim forumi doirasida Rossiyada Osiyo universitetlari Assotsiatsiyasining Kongressi o‘tkazildi.
Anjumanda assotsiatsiyaga kiruvchi 8 davlatdan (O‘zbekiston, Xitoy, Rossiya, Qozog‘iston, Qirg‘iziston, Mo‘g‘uliston, Tojikiston, Armaniston) 72 ta universitetning rektor va prorektorlari, jami 112 delegat ishtirok etdi.
Osiyo universitetlari assotsiatsiyasi
© Samarqand davlat universiteti
Assotsiatsiyaga prezidentlik lavozimining muddati ikki yil bo‘lib, 2022-2024 yillarni o‘z ichiga oladi.
Rustam Xolmurodov anjuman qatnashchilarini ish rejasi bilan tanishtirdi.
Unda Osiyo mamlakatlarida assotsiatsiyani institutsionalizatsiya qilish va universitetlarning ishga jalb qilinishini kuchaytirish, assotsiatsiyaga yangi ishtirokchilarni kiritish hamda hamkorlik geografiyasini kengaytirish, qo‘shma o‘quv dasturlarini taqdim etish, tadbirlar ro‘yxatini tasdiqlash masalalari ko‘rsatilgan.
Osiyo universitetlari Assotsiatsiyasining prezidenti tomonidan ilgari surilgan takliqlar:
IT texnologiyalar, agrobiotexnologiyalar sohasini rivojlantirish;
Qayta tiklanadigan energiya manbalarini ishlab chiqarishni yanada kengaytirish;
Mintaqalardan kelib chiqib, ekologik muammolarni bartaraf etish yuzasidan Osiyo universitetlari Assotsiatsiyasi tarkibidagi universitetlar o‘rtasida ilmiy guruhlar tuzish;
Hamkorlikda ilmiy loyihalarni amalga oshirish va ilmiy ma’lumotlar almashish bo‘yicha tizimli ishlarni amalga oshirish.
“Bu g‘oyalar nafaqat ta’lim sifatini yaxshilash, balki zamonaviy texnologiyalar bo‘yicha tajriba almashish, yuqoridagi 72 universitet o‘zaro hamkorlikni doimiy yo‘lga qo‘yish imkoniyatini beradi”, deyiladi xabarda.