TOShKENT, 15 sen — Sputnik. Rossiya Eronnning Shanxay hamkorlik tashkilotiga (ShHT) qo‘shilishidan mamnun. Bu haqda Rossiya prezidenti Samarqandda Eron prezidenti Ibrohim Raisiy bilan bo‘lib o‘tgan uchrashuvda ma’lum qildi.
“Eron ShHTning to‘laqonli a’zo bo‘lishi uchun barcha ishni bajaramiz. So‘nggi rasmiyatchilik qoldi xolos”, - dedi Rossiya rahbari.
Raisiy o‘z navbatida Putinga Eronni ShHTga qo‘shilish jarayonida qo‘llab-quvvatlagani uchun minnatdorchilik bildirdi.
Avvalroq Tehron mamlakatga ShHTga to‘laqonli a’zolikka yo‘l ochuvchi tashkilot doirasidagi majburiyatlar to‘g‘risidagi memorandumni imzolagani xabar qilingan edi.
Rasmiy Tehron tegishli majburiyatlarni to‘liq bajarib, qator hujjatlarni ratifikatsiya qilganidan so‘ng tashkilotga to‘laqonli a’zo sifatida qabul qilinadi. 2021-yil Dushanbeda bo‘lib o‘tgan sammitda Eronni tashkilotga qabul qilish jarayoni boshlangan edi.
Eslatib o‘tamiz, Putin va Raisiy ShHT Davlat rahbarlari kengashining 22-majlisi tadbirlarida ishtirok etish uchun Samarqand shahriga kelishgan. Sammit ishida ShHTga a’zo mamlakatlar – Pokiston, Rossiya, Tojikiston, Xitoy, O‘zbekiston, Qirg‘iziston, Qozog‘iston, Hindiston, shuningdek, tashkilot huzuridagi kuzatuvchi davlatlar – Belarus, Mo‘g‘uliston va Eron yetakchilari ishtirok etadi.