TOShKENT, 14 sen — Sputnik. Bugun Samarqandga Eron, Xitoy va Qirg‘iziston yetakchilari keladi. Bu haqda ShHT Samarqand sammitining matbuot markazida OAV vakillari uchun tashkil etilgan brifingda ma’lum qilindi.
“Ayni daqiqalarda Birlashgan Millatlar Tashkiloti bosh kotibi o‘rinbosari Rozmari Di Karloning tashrifi kutilmoqda”, - dedi prezidentining matbuot kotibi Sherzod Asadov.
Shuningdek, bugun Eron prezidenti Ibrohim Raisiyning rasmiy tashrifi boshlanadi. U Samarqandga kunning ikkinchi yarmida yetib keladi, oliy darajadagi muzokaralar bugunning o‘zida bo‘lib o‘tadi.
Uchrashuv yakunida savdo, kooperatsiya, innovatsiyalar, transport, energetika, turizm va boshqa yo‘nalishlarda hujjatlar imzolanishi rejalashtirilgan.
14 sentabr kuniga rejalashtirilgan tadbirlar to‘g‘risida ma’lumot:
Prezident Shavkat Mirziyoyev mamlakatga kelgan Mo‘g‘uliston prezidenti Uxnaagiyn Xurelsux bilan uchrashuv o‘tkazadi;
Davlat rahbari BMT bosh kotibi o‘rinbosari Rozmari Di Karloni qabul qiladi;
Eron prezidenti Ibrohim Raisiyning mamlakatga rasmiy tashrifi boshlanadi. Oliy darajadagi O‘zbekiston-Eron muzokaralari bo‘lib o‘tadi;
Xitoy raisi Si Szinpin davlat tashrifi bilan O‘zbekistonga keladi;
Sammit tadbirlarida ishtirok etish uchun Qirg‘iziston prezidenti Sadir Japarov mamlakatga keladi.
Qolgan barcha mehmonlar tashrifi esa ertaga, 15-sentabr kuni kutilmoqda. Va shu kuni ko‘plab ikki tomonlama muzokaralar rejalashtirilgan.
Asosiy tadbir 16-sentabr kuni Shavkat Mirziyoyev raisligida yangi turizm markazidagi Kongress xolda bo‘lib o‘tadi.
Eslatib o‘tamiz, Mo‘g‘uliston prezidenti Uxnagiyn Xurelsux Shanxay hamkorlik tashkiloti Davlat rahbarlari kengashining 22-majlisida qatnashish uchun Samarqandga yetib keldi. Oliy martabali mehmonni O‘zbekiston bosh vaziri Abdulla Aripov kutib oldi.