TOShKENT, 14 sen — Sputnik. Armaniston Milliy assambleyasi binosi oldida mamlakat bosh vaziri Nikol Pashinyanga impichment jarayonini boshlash talabi bilan miting bo‘lib o‘tmoqda.
Aksiyada 44 kunlik urushda halok bo‘lgan askarlarning yaqinlari, qator muxolifat kuchlari vakillari ishtirok etmoqda.
Pashinyanning iste’fosini talab qilgan miting ishtirokchilari ayni paytda ham Armaniston parlamenti binosi yonida to‘plangan. Namoyishchilar o‘zlari bilan suv va oziq-ovqat olib kelgan.
Armaniston tomonining ma’lum qilishicha, 13-sentabr kuni yarim tunda Ozarbayjon Qurolli kuchlari bo‘linmalari armanlarning turli yo‘nalishlarda – Sotk, Vardenis, Goris, Kapan, Artanish va Ishxanasardagi pozitsiyalarini jadal o‘qqa tuta boshladi. Bosh vazir Nikol Pashinyan ta’kidlaganidek, chegarada o‘qqa tutilish natijasida Armanistonning yo‘qotishlari 49 kishini tashkil qildi, bu raqam yakuniy emas.
Armaniston hukumati allaqachon vaziyat keskinlashgani munosabati bilan Rossiya, KXShT va BMT Xavfsizlik Kengashiga murojaat qilgan.