TOShKENT, 11 sen — Sputnik. Shanxay hamkorlik tashkiloti (ShHT)ga a’zo davlatlar rahbarlarining Samarqandda bo‘lib o‘tadigan sammitida ustuvor yo‘nalishlarda ilmiy-texnikaviy hamkorlik bo‘yicha harakatlar rejasi kelishib olinadi. Bu haqda O‘zbekiston TIV matbuot xizmati xabar qildi.
Ham ko‘p tomonlama formatda, ham ishtirokchi davlatlar bilan ilmiy-texnikaviy hamkorlikni yanada rivojlantirish va innovatsiyalar sohasidagi hamkorlik O‘zbekistonning ShHTdagi raisligining muhim ustuvor yo‘nalishlari sifatida belgilangan.
Hozirgi vaqtda ShHTga a’zo davlatlarning ilmiy-texnik hamkorligi birinchi navbatda odamlarning farovonligini oshirishga, ularning turmush darajasini oshirishga qaratilgan. Shunday qilib, O‘zbekiston ShHT doirasida fan, texnologiya va innovatsiyalar sohasidagi hamkorlikni kuchaytirish tarafdori.
Avvalroq Toshkentda bo‘lib o‘tgan ShHTga a’zo davlatlarning ilm-fan va texnika sohalarining rivojlanishiga mas’ul vazirliklari va tashkilotlari rahbarlarining oltinchi yig‘ilishida O‘zbekiston 2022-2025 yillarga mo‘ljallangan rejalarini qo‘llab-quvvatlash uchun bir qator tashabbus va takliflar bilan chiqdi.
Respublika Orolbo‘yi mintaqasini ekologik va gumanitar inqiroz zonasidan ekologik innovatsiyalar va texnologiyalar zonasiga aylantirish maqsadida "Orolbo‘yi mintaqalari uchun innovatsiyalar" dasturini ilgari surdi.
Bundan tashqari, O‘zbekiston tashkilotning chekka hududlarida noyob va yo‘qolib ketish xavfi ostida turgan o‘simliklarning barcha turlarini avtomatik tanib olishning yangi raqamli modelini joriy etish asosida "ShHTga a’zo davlatlar florasi" umumiy to‘plamini yaratish tashabbusi bilan chiqdi.
Shuningdek, respublika iqlim o‘zgarishiga qarshi kurashish, xususan atmosferadagi karbonat angidrid (SO2) va boshqa issiqxona gazlari darajasini pasaytirish va ShHTga a’zo davlatlarning birinchi raqamli innovatsion texnologiyalar yarmarkasini o‘tkazish bo‘yicha "yashil energiya" qo‘shma ilmiy dasturini ishlab chiqish va amalga oshirishni taklif qildi.
Boshqa masalalar qatorida O‘zbekiston tomoni ShHTga a’zo davlatlarning yosh olimlari va mutaxassislarining innovatsion faoliyatini qo‘llab-quvvatlash va xalqaro ilmiy tadbirlarda ishtirokini kuchaytirish maqsadida fan va texnika sohasida mukofot ta’sis etish taklifini o‘rtaga tashlagan.
Bu mukofot yangi ilmiy kashfiyotlar va innovatsion yutuqlar uchun qulay shart-sharoitlar yaratish uchun fan va texnologiyalarni rivojlantirishga qo‘shgan ulkan hissasi uchun yosh mutaxassislarga beriladi. Yoshlarni ilm-fanga targ‘ib qilish bo‘yicha bunday tashabbuslar uyushmaga a’zo davlatlar rahbarlari orasida keng qo‘llab-quvvatlanmoqda.
Shuni ham ta’kidlash joizki, O‘zbekiston prezidenti Shavkat Mirziyoyev ilmiy va innovatsion faoliyatni qo‘llab-quvvatlashga katta e’tibor qaratmoqda.
Respublikada 2019-2021 yillarga mo‘ljallangan innovatsion rivojlanish strategiyasi, "Ilm-fan va ilmiy faoliyat to‘g‘risida", "Innovatsion faoliyat to‘g‘risida" gi qonunlar va 2030-yilgacha fanni rivojlantirish konsepsiyasi qabul qilindi. Ular mamlakatning o‘rta va uzoq muddatli istiqbollarining ilmiy va innovatsion rivojlanish asoslarini belgilaydi.