TOShKENT, 9 sen - Sputnik. O‘zbekiston oliy ta’lim tizimida yangi o‘quv yili boshlandi. Turli viloyatlardan poytaxtga talabalar oqimi kirib kelmoqda. Sputnik muxbiri xabariga asosan.
Oliy va o‘rta maxsus ta’lim vaziri Abduqodir Toshqulov AOKAda bo‘lib o‘tgan brifingda yotoqxonlar soni talabalar soniga mos kelmasligi haqidagi ma’lumotlarni taqdim etdi.
1991-2010 yillarda yotoqxona o‘rinlari soni ortish o‘rniga kamaygan. 2010-2016 yillarda 2000 o‘rinli talabalar turar-joyi barpo etilgan. Hozirgi kunda bitta talaba uchun turar-joy qiymati 40-50 million so‘m atrofida, ya’ni, masalan, 400 o‘rinli talabalar turar-joyi taxminan 20 mlrd so‘m atrofida bo‘ladi.
2017-2022 yil yakuni bilan 56 ming o‘rinli talabalar turar-joyi bo‘lyapti. Bu 2010-2016 yilga nisbatan 28 barobar ko‘p.
“Dunyo oliy ta’lim tizimini o‘rganganimizda, dunyoda oliy ta’lim ommalashib borapti. Lekin talabalarni 100 foiz turar joy bilan ta’minlagan birorta davlat yo‘q. Qanchadan qancha ota-onalar talabalar turar joyi yo‘qligi uchun bolasini xorijga yubormagan, xorijiy grantlarda o‘qishga nisbatan yashash sharoiti qimmat”, dedi vazir Toshqulov.
O‘zbekistonda 2016-yilda 77 ta OTM bo‘lgan bo‘lsa ayni kunda ularning soni 172 taga yetdi. Unda tahsil oluvchi talabalar esa 200 ming nafardan 800 ming nafarga yetdi.
Shuningdek, Prezident topshirig‘i bilan ijara uchun 120 milliard pul ajratilgan bo‘lsa,bundan 15 milliard so‘m o‘zlashtirilgan.