TOShKENT, 4 sen — Sputnik. O‘zbekistonda 2023-yildan yakka tartibdagi tadbirkorlar bilan ishlaganlarning ijtimoiy solig‘i kamaytiriladi. Bu prezidentning “Norasmiy bandlik ulushini qisqartirish hamda mehnat resurslari balansini zamonaviy yondashuvlar asosida shakllantirish chora-tadbirlari to‘g‘risida”gi qarorida ko‘zda tutilgan.
2023 yil 1-yanvardan YaTTlar bilan mehnat munosabatlarida bo‘lgan jismoniy shaxslar uchun ijtimoiy soliq summasining eng kam miqdori oyiga BHMning 50 foizidan yiliga BHMning bir baravarigacha kamaytiriladi.
Savdo majmualari va bozorlarda faoliyat yuritayotgan yakka tartibdagi tadbirkorlar bilan mehnat munosabatlarida bo‘lgan jismoniy shaxslar bundan mustasno.
2023 yil 1-yanvardan o‘zining shaxsiy tomorqa yer uchastkasida quyidagi faoliyat turlari bilan shug‘ullanayotganlar yiliga BHMning kamida 1 baravari miqdorida ijtimoiy soliq to‘lagan taqdirda, ular rasmiy band bo‘lgan aholi toifasiga kiritiladi va bu davr ularning mehnat stajiga qo‘shiladi: chorvachilik (qoramol, qo‘y, echki, ot va boshqalar); issiqxona; parrandachilik (bedana, kurka, g‘oz, o‘rdak); quyonchilik; asalarichilik; baliqchilik; bog‘dorchilik; limonchilik; gulchilik.
Avvalroq yana 10 ta soha vakillari o‘zini o‘zi band qilgan shaxslar ro‘yxatiga kiritilishi xabar qilingan edi.