TOShKENT, 4 sen — Sputnik. O‘zbekistonning Rossiyadagi elchixonasi, Tashqi mehnat migratsiyasi masalalari agentligi vakolatxonalari, elchi Botirjon Asadov boshchiligidagi diaspora tashkilotlari rahbarlari Moskvadagi Islom Karimov maydoniga tashrif buyurdi. Bu haqda “Dunyo” axborot agentligi xabar berdi.
Qayd etilishicha, ular ishtirokida O‘zbekistonning birinchi prezidenti xotirasini e’zozlash va uning tarixiga hurmat ko‘rsatish maqsadida Islom Karimov haykali poyiga gullar qo‘yilgan.
Ma’lumot uchun, 2016-yilning kuzida Islom Karimov vafotidan so‘ng Rossiya va O‘zbekistonning fan hamda madaniyat arboblari Moskva rasmiylariga shaharda umummilliy yetakchi xotirasiga maydon ochish taklifi bilan murojaat qilgan edi.
Ushbu taklif Hududiy birliklarni nomlash bo‘yicha shahar idoralararo komissiyasi tomonidan ma’qullandi va 2016-yil 1-noyabrda Moskva meriyasi Prezidiumi O‘zbekiston elchixonasi binosi yonidagi maydonga Karimov nomini berish to‘g‘risida qaror qabul qildi.
Islom Karimov haykali 2018-yilda O‘zbekiston delegatsiyasi, jumladan, Respublika Senati spikeri Nig‘matilla Yo‘ldoshev va Karimovning bevasi Tatyana Karimova ishtirokida ochilgan edi. Yodgorlik Samarqand shahridagi tarixiy Registon maydoni me’moriy ansambli fonida Karimovning to‘liq metrajli siymosi hisoblanadi. Yodgorlik bronzadan yasalgan.