TOShKENT, 30 avg — Sputnik. Kiyev nima qilsa ham, Xerson viloyati hech qachon Ukraina nazorati ostiga qaytmaydi. Bu haqda viloyat ma’muriyati rahbari o‘rinbosari Kirill Stremousov ma’lum qildi.
“Ular nima va’da qilmasin, nima qilmasin, bugun bizda mavjud bo‘lgan va qo‘lga kiritilgan adolatga qarshi kurashishga qanchalik urinmasin Xerson viloyati hech qachon natsistlar nazorati ostiga qaytmaydi”, dedi Stremousov jurnalistlarga.
Uning so‘zlariga ko‘ra, Xerson Rossiya shahri bo‘lgan, hozir ham shunday va shunday bo‘lib qoladi, barcha hujumlar befoyda.
“Bugun urushga kirib, qandaydir tarzda natsizmning tushunarsiz g‘oyasi bilan yashashga urinayotganlarning hammasi halokatga uchradi, ularning hujumlari befoyda. Rossiya urush boshlamaydi, Rossiya urushni tugatadi”, dedi Stremousov.
Rossiya Mudofaa vazirligi Ukraina qo‘shinlari Xerson va Nikolayev viloyatlarida uyushtirilgan hujum paytida 560 dan ortiq odam, 26 tank va ikkita hujumchi samolyotini yo‘qotganini ma’lum qildi. Hujumga urinish muvaffaqiyatsiz yakunlangani ta’kidlandi.
Maxsus operatsiya davomida Rossiya harbiylari Xerson va Zaporojye viloyatining Azov dengiziga tutash qismini nazoratga oldi, Xerson, Melitopol va Berdansk kabi yirik shaharlarni ozod qildi. Har ikki viloyatda yangi ma’muriyatlar shakllantirildi, Rossiya telekanallari va radiostansiyalari efirga uzatilmoqda, Qrim bilan savdo va transport aloqalari tiklanmoqda. Viloyatlar Rossiya tarkibiga kirish rejalarini e’lon qildi. Bundan tashqari, sakkiz yil o‘tgach, Shimoliy Qrim kanali blokdan chiqarildi.