TOShKENT, 29 avg — Sputnik. MAGATE missiyasining Zaporojye atom elektr stansiyasiga kutilayotgan tashrifi Kiyev rasmiylarida vahima uyg‘otdi. Bu haqda Zaporojye viloyati ma’muriyati bosh kengashi a’zosi Vladimir Rogov ma’lum qildi.
Avvalroq Atom energiyasi bo‘yicha xalqaro agentlik (MAGATE) bosh direktori Rafael Grossi tashkilot missiyasi Zaporojye AESga yo‘l olayotgani va shu hafta yetib borishini ma’lum qilgandi.
“Agar Kiyev rejimi uni buzmasa, tashrif shu hafta amalga oshiriladi. Zelenskiy va uning jamoasi vahima ichida. Axir, agar MAGATE tekshiruvi kelsa, butun dunyo stansiyani kim o‘qqa tutayotganini, Ukraina davrida u yerda nima uchun taqiqlangan tajribalar o‘tkazilganini va Zaporojye viloyati aholisi mintaqaning Rossiya tarkibiga kirishiga qanday intilayotganini bilib oladi”, dedi Rogov.
“Zaporojye viloyatidagi Energodar va boshqa aholi punktlarini o‘qqa tutib, Zelenskiy rejimi aholidan Rossiya tarkibida yashash va uning fuqarosi bo‘lishni tanlaganliklari uchun qasos olmoqda”, dedi Rogov.
Maxsus operatsiya davomida Rossiya harbiylari Xerson viloyati va Zaporojye viloyatining Azov qismini nazoratga oldi, Xerson, Melitopol va Berdansk kabi yirik shaharlarni ozod qildi.
Har ikki viloyatda yangi ma’muriyatlar shakllantirildi, Rossiya telekanallari va radiostansiyalari efirga uzatilmoqda, Qrim bilan savdo va transport aloqalari tiklanmoqda. Viloyatlar Rossiya tarkibiga kirish rejalarini e’lon qildi. Bundan tashqari, sakkiz yil o‘tgach, Shimoliy Qrim kanali blokdan chiqarildi.