TOShKENT, 24 avg — Sputnik. Ukraina prezidenti Vladimir Zelenskiy Rossiyaning maxsus operatsiyasini to‘xtatish uchun fevral oyida iste’foga chiqishga rozi bo‘lgan. Bu haqda “The Washington Post” yozmoqda.
“Men hokimiyatni ushlab qolishga harakat qilmayapman. Agar masala faqat mening ketishimda bo‘lsa va bu qon to‘kilishini to‘xtatsa, unda men roziman. Men hozirning o‘zida ketaman. Men siyosatga bu maqsadda kirganim yo‘q. Agar bu urushni to‘xtatsa, ket desangiz ketaman”, deya Zelenskiyning so‘zlaridan iqtibos keltirilgan.
Maqolada qayd etilishicha, Zelenskiy AQSh va Yevropa rasmiylaridan hokimiyat uzluksizligini saqlab qolish zarurligi haqida ham murojaatlar olgan. Ba’zi hollarda unga poytaxtni tark etishga yordam berish taklif qilingan.
Bundan tashqari, Zelenskiy o‘zining ba’zi xorijiy suhbatdoshlari mojaroning iloji boricha tezroq tugatilishini, uning ma’muriyati amalda Rossiyaga taslim bo‘lishini xohlayotganidan gumon qilgan.
“Menga qo‘ng‘iroq qilganlar orasida biz qarshilik ko‘rsatishimizga ishonadigan hech kim yo‘q”, degan Zelenskiy jurnalistlarga.
Rossiya 24-fevraldan beri Ukrainada harbiy maxsus operatsiya o‘tkazmoqda. Rossiya prezidenti Vladimir Putinning so‘zlariga ko‘ra, yakuniy maqsad Donbassni ozod qilish va Rossiyaning o‘z xavfsizligini kafolatlaydigan shart-sharoitlarni yaratishdir. Ittifoqchi kuchlar allaqachon Lugansk Xalq Respublikasi va Doneskning muhim qismini, jumladan, Volnovaxa, Mariupol va Svatogorskni to‘liq ozod qilgan.