TOShKENT, 11 avg — Sputnik. “Zarafshon” milliy tabiat bog‘i Ekologiya va atrof muhitni muhofaza qilish davlat qo‘mitasi tizimiga o‘tkazildi. Bu bo‘yicha hukumatning 442 - sonli qarori qabul qilindi.
Hujjatga muvofiq, O‘rmon xo‘jaligi davlat qo‘mitasi va Samarqand viloyati hokimligi tasarrufidagi Jomboy va Bulung‘ur tumanlarida joylashgan "Zarafshon" milliy tabiat bog‘i Ekoqo‘mitaga tarkibiga kiritildi.
Ekoqo‘mita 3 oy ichida bog‘ bo‘yicha nizom ishlab chiqadi va uni davlat ro‘yxatidan o‘tkazadi.
Shuningdek, 1-noyabrga qadar Suv xo‘jaligi vazirligi, O‘rmon xo‘jaligi davlat qo‘mitasi, Fanlar akademiyasi va viloyat hokimligi birgalikda bog‘dagi Buxoro bug‘ularini yaxlit saqlash va Zarafshon darosidagi suv sathi pasayishi sababli kelib chiqadigan muammolarga yechim sifatida takliflar kiritadi.
Tabiatni muhofaza qilish sohasidagi qonunchilik hujjatlari talablariga rioya etilishi yuzasidan targ‘ibot va davlat ekologiya nazorat ishlari kuchaytiriladi.
Endilikda Fanlar akademiyasi "Zarafshon" milliy tabiat bog‘i hududida tabiiy obyektlar monitoringini yuritib, ilmiy-tadqiqot ishlarini olib boradi.
Ma’lumt uchun, Zarafshon milliy bog‘ining umumiy maydoni 2426,2 gektarga teng bo‘lib, u yetti hududga bo‘lingan. Milliy tabiat bog‘idagi bahaybat turangazorlar, chakanda, malinxula, yovvoyi do‘lana va quyuq to‘qayzor boshqa hududda aynan uchramaydi.
Bog‘ning uchta hududi sayyohlarni qabul qiladigan maskan sifatida tanlab olingan. Ular uchun yayov yurish, mashinada aylanish, velosipedda sayr qilish, otda yurish marshrutlari bo‘yicha xizmat ko‘rsatiladi.