Termizda 6 kun davom etgan o‘zbek va tojik harbiylarining hamkorlikdagi “Hamdo‘stlik-2022” mashg‘ulotlari yakunlandi. Bu haqda O‘zbekiston Mudofaa vazirligi matbuot xizmati xabar berdi.
O‘zbekiston va Tojikiston mudofaa vazirlari general-leytenant Bahodir Qurbonov va general-polkovnik Sherali Mirzo hamda Surxondaryo viloyati hokimi To‘ra Bobolov va mashg‘ulotlarning asosiy bosqichini kuzatishdi.
Mashg‘ulot rejasiga ko‘ra ikki davlat chegarasini buzib kirmoqchi bo‘lgan shartli dushman to‘dalariga motoo‘qchi, tank, artilleriya va boshqa jangovar bo‘linmalar tomonidan aniq zarbalar berildi.
Amaliy o‘quv yakunida ikki mamlakat mudofaa vazirlari "Hamdo‘stlik—2022" hamkorlikdagi o‘quv ishtirokchilari va tashkilotchilarini erishilgan yutuqlar bilan tabriklashdi.
Jarayonlarda faol qatnashgan har ikki davlat harbiy xizmatchilari O‘zbekiston va Tojikiston Mudofaa vazirliklari tomonidan ta’sis etilgan medallar, esdalik nishonlari va qimmatbaho sovg‘alar bilan taqdirlandilar.