TOShKENT, 9 avg — Sputnik. Toshkent shahrida ekologik reyd boshlandi. U Davlat ekologiya qo‘mitasi tashabbusi bilan o‘tkazilmoqda.
Qo‘mita xabarida yozilishicha, ekologiya, Milliy gvardiya, ichki ishlar xodimlaridan iborat ekopatrul inspektorlariga hududlarda amalga oshirilishi lozim bo‘lgan vazifalar tushuntirilgan.
Ekologik reydlar jarayonida “Tabiatni muhofaza qilish to‘g‘risida”gi qonun talablari bajarilishini ta’minlash, aholi ekologik madaniyatini yuksaltirish borasida targ‘ibot va tashviqot ishlari olib borilishi yuzasidan zaruriy tavsiyalar berilgan.
Ta’kidlanishicha, ekologik nazorat reyd tadbirlarini samarali bir tarzda o‘tkazish bo‘yicha aniq chora-tadbirlar belgilangan.
Ayni paytda poytaxtda hamkorlikda nazorat reyd tadbirlari amalga oshirilmoqda.