TOShKENT, 2 avg — Sputnik. Tailand yaqin orada Yevroosiyo iqtisodiy ittifoqi mamlakatlari bilan erkin savdo zonasini yaratish bo‘yicha muzokaralar boshlanadi, deb hisoblaydi. Bu haqda Tailandning Rossiyadagi elchisi Sasivat Vongsinsavat RIA Novosti agentligiga bergan intervyusida aytib o‘tdi.
“Tailand YeOII bilan erkin savdo hududini yaratish bo‘yicha muzokaralar imkon qadar tezroq boshlanishini kutmoqda. Bu savdo va investitsiya almashinuvini osonlashtirishga yordam beradi, bugungi kunda uning ahamiyati butun dunyo global ta’minot zanjirlarining uzilishi va oziq-ovqat inqiroziga yuz tutayotgan bir paytda yanada ortib bormoqda”, - dedi Vongsinsavat.
Elchining so‘zlariga ko‘ra, erkin savdo zonasi, shuningdek, madaniy almashinuvga yordam beradi, turli faoliyat sohalari vakillarining harakatchanlik darajasini oshiradi, bu esa, o‘z navbatida, madaniyat, san’at, sport, ta’lim, turizm va boshqa sohalar orqali bir-biri bilan o‘zaro aloqada bo‘lish imkonini beradi.
“Natijada odamlar o‘rtasida o‘zaro tushunish kuchayadi”, dedi elchi.
Eslatib o‘tamiz, YeOII bugungi kunda beshta davlatni o‘z ichiga oladi: Armaniston, Belarus, Qozog‘iston, Qirg‘iziston va Rossiya. O‘zbekiston, Moldova va Kuba kuzatuvchi davlat maqomida. O‘zbekiston tashkilotga to‘liq a’zo bo‘lish imkoniyatini ko‘rib chiqmoqda.