TOShKENT, 25-iyul — Sputnik. AQShning sobiq prezidenti Donald Trampning so‘zlariga ko‘ra, Amerika ma’muriyatining amaldagi rahbari demokrat Jo Bayden Qo‘shma Shtatlarni boshqalardan yordam so‘rashga majbur bo‘lgan “kambag‘al mamlakat”ga aylantirgan. Bu haqda RT xabar berdi.
Donald Trampning so‘zlariga ko‘ra, bor-yo‘g‘i ikki yil ichida Qo‘shma Shtatlar dunyoda tan olinishi va hurmati jihatidan eng qudratli davlatdan eng zaif davlatga aylangan.
“Endi bizni hech kim hurmat qilmaydi”, - deya ta’kidladi u Floridadagi talabalar konferensiyasida so‘zlagan nutqida.
Shuningdek, Donald Tramp ikki yil avval AQSh energetika sohasida Rossiya va Saudiya Arabistoni bilan raqobatlashishga yaqin turganini esladi.
“Endi biz kambag‘al davlatmiz. Bayden tiz cho‘kib, dunyodan energiya manbalarini so‘rab, yordam so‘rab yurgan kambag‘al mamlakat”, - deya xulosa qildi sobiq prezident.
Avvalroq, Tramp AQSh iqtisodiyoti allaqachon tanazzulga yuz tutganini aytgan edi.