TOShKENT, 23-iyul — Sputnik. Sanitariya-epidemiologiya xizmati tomonidan o‘ta xavfli yuqumli kasalliklar, jumladan vabo kasalligini tarqalashini oldini olishga qaratilgan epidemiyaga qarshi va profilaktik chora-tadbirlar qat’iy nazoratga olingan.
Bugungi kunda, vabo kasalligi respublikada qayd etilmagan, epidemik vaziyat barqarorligi ta’minlanmoqda.
Sanitariya-epidemiologiya xizmati axborot xizmati ma’lum qilishicha, vabo profilaktikasida aholini toza ichimlik suvi bilan ta’minlash, ifloslangan oqava suvlarni muntazam ravishda zararsizlantirish, oziq-ovqat mahsulotlarini ishlab chiqaruvchi korxonalarda sanitariya-gigiyena qoida va talablariga qat’iy ravishda amal qilishning ahamiyati katta.
Kasallik mavsumiy xususiyatga egaligi sababli, issiq kunlar mavsumida, har haftada ochiq suv xavzalaridan namunalar olinib, vabo vibrionlari va shu oilaga yaqin vibrion(AG va NAG vibrionlar)larga tekshirilishi amalga oshirib kelinadi.
Respublikada doimiy ravishda tashqi muhit ochiq suv havzalaridan AG, NAG vibrionlariga laboratoriya tekshirishlari o‘tkazilib turiladi. Laboratoriya tahlillarida bunday vibrionlar aniqlangan hududlarda kasallikning aholi o‘rtasida kelib chiqishi va tarqalishini oldini olish bo‘yicha bir qator tadbirlar amalga oshiriladi.