TOShKENT, 22-iyul — Sputnik. 2022 yilning birinchi yarmida o‘tkazilgan pedagog kadrlar attestatsiyasida ishtirok etgan jami pedagoglarning 68 foizi ijobiy natija qayd etdi. Bu haqda Ta’lim inspeksiyasi matbuot kotibi Shavkat Xo‘jaqulov bugun bo‘lib o‘tgan brifingda ma’lum qildi.
Yakuniy natijalariga ko‘ra, attestatsiyada ishtirok etgan jami pedagoglarning:
· 16 ming 190 nafari, ya’ni 6 foizi oliy malaka toifasi;
· 53 ming 662 nafari ya’ni 19 foizi birinchi malaka toifasi;
· 104 ming 782 nafari ya’ni 38 foiz ikkinchi malaka toifasi olishga muvaffaq bo‘lgan.
Shavkat Xo‘jaqulovning ta’kidlashicha, 22 ming 626 nafar ya’ni 8 foiz pedagoglarga mutaxassis malaka toifasi berish to‘g‘risida qarorlar qabul qilingan. 20 ming 30 nafar ya’ni 7 foiz pedagoglar esa “Mutaxassis lavozimiga muvofiq emas” deb topilgan.
Attestatsiyada ishtirok etib, past natija qayd etgan 61 489 (22,1 foiz) nafar pedagoglar o‘z ixtiyori bilan navbatdan tashqari qantashganliklari sababli ularga nisbatan salbiy qarorlar qabul qilinmagan, ya’ni amaldagi toifasi pasaytirilmagan.
Ta’kidlash joizki, ushbu attestatsiyada ishtirok etgan jami pedagoglarning 68 foizi ijobiy natija qayd etgan.