TOShKENT, 21-iyul — Sputnik. Issiqko‘lda O‘zbekiston, Qozog‘iston va Qirg‘iziston yetakchilari samimiy muloqot qildi.
Markaziy Osiyo davlatlari rahbarlarining sammiti oldidan O‘zbekiston prezidenti Shavkat Mirziyoyev, Qozog‘iston prezidenti Qasim-Jomart Toqayev va Qirg‘iziston prezidenti Sadir Japarovning norasmiy uchrashuvi bo‘lib o‘tdi.
Davlat rahbarlari birgalikda "Nomad" madaniyat markaziga bordilar. Hunarmandchilik buyumlari ko‘rgazmasi ko‘zdan kechirildi. So‘ng ko‘chmanchilar o‘yinlari namoyish etildi.
Markaziy Osiyo xalqlari kuy-qo‘shiqlaridan tuzilgan konsert dasturida ellarning birligi, madaniy yaqinligi namoyon bo‘ldi.
Eslatib o‘tamiz, bugun Cho‘lponotada Markaziy Osiyo davlatlari rahbarlarining Maslahat uchrashuvi bo‘lib o‘tadi.
Sammitda savdo, transport va logistika, sanoat kooperatsiyasi, innovatsiyalar, oziq-ovqat xavfsizligi, turizm, madaniy-gumanitar sohalardagi amaliy hamkorlikni yanada kengaytirish masalalari muhokama qilinadi. Shuningdek, mintaqada barqarorlik va izchil taraqqiyotni ta’minlash masalalari yuzasidan fikr almashiladi.