TOShKENT, 17-iyul — Sputnik. Toshkentdagi “Yunusobod" sport majmuasida og‘ir atletika bo‘yicha o‘smirlar va yoshlar o‘rtasidagi qit’a birinchiligi boshlandi. Bu haqda Milliy olimpiya qo‘mitasi matbuot xizmati xabar bermoqda.
21 mamlakatdan tashrif buyurgan polvonlar 25-iyulga qadar Osiyo chempionligi uchun bahs olib borishadi.
Jo‘rabek Zoirov va Nurillo Tog‘ayev murabbiyligidagi O‘zbekiston jamoasi musobaqada deyarli har bir vazn toifasida medallar uchun kurash olib boradi. Chempionatning birinchi kunida o‘smir yigitlar o‘rtasida -49, qizlar toifasida -40 kg vazn toifalarida g‘olib va sovrindorlar aniqlab olinadi.