TOShKENT, 15-iyun — Sputnik. O‘zbekiston milliy terma jamoasi 2023-yilda o‘tkaziladigan futbol bo‘yicha Osiyo kubogining saralash bosqichi doirasida Tailand jamoasiga qarshi maydonga tushdi.
Namanganda o‘tgan o‘yinning 8-daqiqasida Jaloliddin Masharipov hisobni ochdi. 23-daqiqaga kelib Azizbek Turg‘unboyev farqni ikkitaga oshirdi.
Shu tariqa “oq bo‘rilar” 2:0 hisobida Tailand ustidan zafar quchishdi va o‘z guruhida 1-o‘rin bilan Osiyo kubogiga yo‘l oladigan bo‘lishdi. Srechko Katanes shogirdlari ushbu o‘yin boshlanishidan avval Osiyo kubogi yo‘llanmasini qo‘lga kiritib bo‘lgan edi.
Eslatib o‘tamiz, O‘zbekiston saralash bosqichi doirasida Shri-Lanka va Maldiv orollari terma jamoalarini yirik hisobda mag‘lubiyatga uchratgan edi. Qayd etish joizki, terma jamoa har uchala o‘yinda darvoza yaxlitligini saqlab qolishga muvaffaq bo‘ldi.