Buxoro shahrida ichimlik suvi ta’minoti to‘liq tiklandi

TOShKENT, 12-iyun — Sputnik. Buxoro shahrida 12-iyun kuni suv quvurdagi nosozlik bartaraf etilib, ichimlik suvi ta’minoti to‘liq tiklandi. Bu haqda Buxoro viloyati hokimligi matbuot xizmati xabar bermoqda.

Kecha, 11-iyun kuni, Buxoro shahri Piridastgir ko‘chasidan o‘tuvchi markaziy ichimlik suvi quvurida nosozlik yuzaga kelgani tufayli shahar aholisining ichimlik suvi ta’minoti vaqtincha to‘xtatilgan edi.

"Buxoro suv ta’minoti" MChJ mutaxassislari avariya-tiklash ishlarini olib borishgan va natijada yaroqsiz holga kelib qolgan shisha tolali hobus diametri 700 millimetr bo‘lgan po‘lat quvurga almashtirilgan.

“Ta’mirlash ishlari yakunlanib, ayni paytda Buxoro shahrining barcha hududlarida ichimlik suvi ta’minoti to‘liq qayta tiklandi”, - deyilgan xabarda.