TOShKENT, 10-iyun — Sputnik. Toshkent viloyati Ohangaron shahrida “Toshkent viloyati imtihon markazi” ish boshladi. Bu haqda viloyat hokimligi xabar berdi.
Endilikda Toshkent viloyati aholisi uchun haydovchilik guvohnomasini olishda nazariy va amaliy imtihonlarni o‘tkazish bo‘yicha yagona davlat xizmatlari ko‘rsatiladi.
Markaz viloyatda haydovchilarni tayyorlash va ularning malakasini jiddiy sinovdan o‘tkazish maqsadida tashkil etildi.
Markazning ochilish marosimida ishtirok etganlar yaratilgan sharoitlar bilan yaqindan tanishishdi hamda avtomobil boshqarish yuzasidan bilimlarni sinovdan o‘tkazish jarayonlariga guvoh bo‘lishdi.
Imtihon markazi nazariy va amaliy imtihonlarni to‘liq avtomatlashtirilgan rejimda o‘tkazish va baholash bo‘yicha davlat talablariga javob beradi.
Imtihon markazi 10-iyundan o‘z ishini boshladi.