TOShKENT, 7-iyun — Sputnik. Bu yildan o‘qishni ko‘chirishga faqat 2 toifadagi talabalarga ruxsat beriladi. Bu haqda Oliy va o‘rta maxsus ta’lim vaziri Abduqodir Toshqulov Qonunchilik palatasining navbatdagi yalpi majlisida ma’lum qildi.
Aytilishicha, endilikda talabalar turmush qursa yoki davlat xizmatchisining ishi boshqa joyga o‘tsagina o‘qishini ko‘chirishi mumkin bo‘ladi.
“Talaba o‘z maqsadini 1 kursdan belgilab olishi kerak. O‘tgan yili o‘qishni ko‘chirish buyicha talabalar tomonidan 60 mingta hujjat topshirilgan. Bu yil esa 150 ming talaba o‘qishini ko‘chirishi prognoz qilingan edi. Bu narsaga barham berilmoqda. Talaba diplomni faqat bir joydan olishi kerak”, deydi Abduqodir Toshqulov.
O‘qishni ko‘chirishda vazir xati talab etiladi. Boshqa toifalardagi talabalarga hech qaysi holatda o‘qishini ko‘chirishga ruxsat berilmaydi.
Shuningdek, vazir o‘z so‘zida ta’lim tizimidagi korrupsiya asosan o‘qishni ko‘chirish jarayonlarida kuzatilayotganini ham qayd etib o‘tdi.