TOShKENT, 6-iyun — Sputnik. Mo‘ynoq tumanidagi 7-maktab va Tik o‘zak ovulidagi xonadonlarga toza ichimlik suvi keldi. Bu haqda “Dunyo”AA xabar berdi.
Orolbo‘yi hududida aholini toza ichimlik suvi bilan ta’minlash loyihasi amalga oshirildi. Unga ko‘ra, maktabning 300 nafardan ortiq o‘quvchi va xodimlari, shuningek, Tik o‘zak ovulidagi 229 ta xonadon toza ichimlik suvi bilan ta’minlandi.
“Chet ellik muhandislar va Orolbo‘yi xalqaro innovatsiya markazi vakillari ushbu hududda suv tozalash uskunalarini aholi yashash punktiga o‘rnatib, sinovdan o‘tkazishdi. 20-may kuni barcha montaj ishlari yakunlanib, qurilma rasman ishga tushirildi”, deyiladi xabarda.
Hozirda Qoraqalpoq davlat universiteti talabalari nasos va suv tozalash uskunalarini o‘rnatish, ishlatish va texnik xizmat ko‘rsatishni o‘rganmoqda.
Aytilishicha, ayni kunlarda Budapesht Korvinus universiteti va Shveysariyaning "LATMA-ADED" nodavlat notijorat tashkiloti xodimlari tomonidan Taxiatosh tumanidagi 8 va 15-sonli umumta’lim maktablari uchun ham shu kabi suv tozalash inshootlarini o‘rnatish masalasi ko‘rib chiqilmoqda.