TOShKENT, 3-iyun — Sputnik. “Haj-2022” mavsumi uchun 1 nafar ziyoratchiga to‘lov miqdori 62 million 900 ming so‘m etib belgilandi. Bu haqda AOKAda o‘tkazilayotgan brifingda Din ishlari bo‘yicha qo‘mita axborot xizmati rahbari Ilhom Ma’rupov ma’lum qildi.
Qayd etilishicha, Saudiya hukumati tomonidan haj safari narxiga ta’sir qiluvchi qo‘shimcha soliq va majburiy to‘lovlar joriy qilingan.
Narxlarning ko‘tarilishiga kommunal, transport, elektr-energiya va boshqa xizmatlar uchun to‘lovlar miqdori bir necha baravar (30-40 foiz) oshgani sabab bo‘lgan.
“Haj amallarini tashkil etuvchi muassasalarning xizmatlariga shu yilda yangi majburiy to‘lovlar joriy etilgan. Shu bois dunyo mamlakatlari uchun haj xizmatlari narxi o‘rtacha 40-45 foizga ko‘tarilgan”, deydi Ilhom Ma’rupov.
Ma’lumot uchun, bu yil O‘zbekistondan 10 865 kishi haj safariga boradi. 2019-yilda bu ko‘rsatkich 7 200 nafar edi.