TOShKENT, 31-may — Sputnik. Toshkentda jismoniy imkoniyati cheklangan va nogironligi bo‘lgan fuqarolar uchun xizmat ko‘rsatuvchi "Mehribon taksi" ish boshladi. Bu haqda Toshkent shahar hokimligi xabar berdi.
An’anaviy taksilardan farqli ravishda bu avtomobillar tayanch-harakat a’zolarida muammolari bor insonlarga mo‘ljallangan.
“Ushbu taksi imkoniyati cheklangan fuqarolarni tibbiy-profilaktika muassasalariga, dorixonalarga, ijtimoiy himoya muassasalarga, madaniy xordiq chiqarish maskanlariga qulay va xavfsiz borib, kelishlari uchun xizmat qiladi”, - deyiladi xabarda.
Shuningdek, ayrim zaruriy hujjatlarni rasmiylashtirish uchun turli idoralarga borishda ham xizmat ko‘rsatadi. Har bir yo‘lovchidan tushgan mablag‘ning ma’lum foizi nogironlarni ijtimoiy muhofaza qiluvchi tashkilotlarning hisob raqamiga o‘tkaziladi.
Ta’kidlanishchia, Mazkur xizmat Markaziy Osiyo mintaqasida ilk amaliyot bo‘lib, yil sayin unga talab va ehtiyoj ortib bormoqda.
Ma’lumot uchun, bugungi kunda Toshkentda 6000 ga yaqin jismoniy imkoniyati cheklangan va nogironligi bo‘lgan fuqarolar istiqomat qilmoqda. Ulardan 300 ga yaqini tayanch-harakat a’zolarida nuqsoni bor insonlardir.