TOShKENT, 31-may — Sputnik. Aholiga suyultirilgan gaz yetkazib berish tartibi yangilandi. Bu haqda “Hududgaztaminot” habar berdi.
“Hududgaztaminot” qariyb to‘rt mingta iste’molchi murojaatini o‘rganib chiqqan. Ularning 40 foizi ikkinchi gaz ballon olish masalasi bilan bog‘liq.
Aytilishicha, iste’molchilar orasida aholi uchun imtiyozli narxda ajratilgan suyultirilgan gazni olib qayta sotish, maishiy gaz ballonlaridan xavfsizlik qoidalariga rioya qilmasdan foydalanish holatlari aniqlandi.
Shu sababli, so‘nggi vaqtda inson hayotiga va sog‘lig‘iga xavf soluvchi 20 dan ortiq turli xil baxtsiz hodisalar ro‘y berishi kuzatilgan.
“Yangi tartibga ko‘ra oila a’zolari ko‘p bo‘lgan va ro‘yxatdan o‘tgan uy xo‘jaliklari endi belgilangan muddatda o‘z ID-karta orqali ikki marotaba gaz olishlari mumkin bo‘ladi”, - deyiladi xabarda.
Endilikda mutaxassislar qo‘shimcha gaz balloni olish bilan bog‘liq har bir murojaatni joyiga chiqqan holda o‘rganib chiqadi.
Bundan tashqari, yangi iste’molchilarni ro‘yxatdan o‘tkazish tartibi ham yangilandi.
Bunda xonadonda texnika va yong‘in xavfsizligi qoidalariga rioya qilish, oshxona va gaz jihozlari belgilangan talab va standarlarga mos kelishiga alohida e’tibor qaratildi.
Gaz ballonni ishga tushirish va sozlash xizmati uchun to‘lov amalga oshirilgandan so‘ng, o‘rnatilgan tartibda shartnoma tuziladi hamda tasdiqlangan jadval asosida manzilga suyultirilgan gaz yetkazib beriladi.