TOShKENT, 29-may — Sputnik. Ukraina prezidenti Vladimir Zelenskiyning mamlakatning NATOga kirishiga oid pozitsiyasi va Donbassdagi mojaroni tartibga solishdan bosh tortishi Rossiya maxsus operatsiyasi boshlanishiga sabab bo‘ldi, deb hisoblaydi sobiq Yaponiya bosh vaziri Sinzdo Abe. U bu haqda “Economist” nashriga bergan intervyusida ma’lum qildi.
“Ehtimol, agar Ukraina prezidenti Vladimir Zelenskiyni uning mamlakati NATOga qo‘shilmasligiga va’da berishga yoki sharqdagi ikki anklavga yuqori darajadagi muxtorlikni taqdim etishga majbur qilishning iloji bo‘lganida harbiy xatti-harakatlarning oldini olish mumkin bo‘lardi”, - dedi Abe. Uning so‘zlaridan RIA Novosti iqtibos keltirgan.
Sobiq Yaponiya bosh vaziri Zelenskiyning pozitsiyasini o‘zgartirishga erishish oson bo‘lmagan bo‘lishini ta’kidladi. Abe Ukraina yetakchisiga uning amerikalik hamkasbi Jo Bayden ta’sir ko‘rsata olgan bo‘lardi deb hisoblaydi.
“Biroq, Zelenskiy, albatta, bosh tortgan bo‘lardi”, - deya xulosa qildi siyosatchi.
Rossiya 24-fevral kuni Ukrainada maxsus harbiy operatsiya boshlanganini e’lon qildi. Prezident Vladimir Putin ushbu operatsiyaning maqsadi "sakkiz yil davomida Kiyev rejimi tomonidan tahqirlangan va genotsidga uchragan odamlarni himoya qilish" deb atagan.
Buning uchun Ukrainani demilitarizatsiya (harbiy infratuzilmalarini yo‘q qilish) va denatsifikatsiya (millatchilik g‘oyalaridan tozalash) qilish talab etiladi.
Mudofaa vazirligi bayonotiga ko‘ra, Qurolli Kuchlar faqat harbiy infratuzilma va Ukraina qo‘shinlariga zarba bermoqda. 25-martga kelib ular birinchi bosqichning asosiy vazifalarini bajarishdi - Ukrainaning jangovar salohiyatini sezilarli darajada kamaytirishdi.
Rossiya Mudofaa vazirligi endi asosiy maqsad - Donbassni ozod qilish ekanini ta’kidlagan.