TOShKENT, 19-may — Sputnik. Turkiya prezidenti Rajab Tayyip Erdog‘an payshanba kuni Ukrainadagi vaziyat tufayli Rossiya prezidenti Vladimir Putin bilan munosabatlarni uzish niyatida emasligini aytdi.
“Biz Rossiya bilan ham, Ukraina bilan ham munosabatlarda muvozanatli siyosat yuritmoqdamiz. Meni janob Putin bilan ham, Zelenskiy bilan ham aloqalarni uzish niyatim yo‘q. Men maxsus vakilimni Moskvaga ham, Kiyevga ham yubordim. Biz siyosatimizni davom ettiramiz, yangi jahon urushi hech kimga foyda keltirmaydi”, - dedi Erdog‘an Anqarada turk yoshlari bilan uchrashuvda.
Turkiya prezidentining so‘zlariga ko‘ra, u Ukrainadagi vaziyat bo‘yicha “Putin va Zelenskiy bilan telefon diplomatiyasini davom ettirish” niyatida.
Shu bilan birga, u uchrashuvda bir necha bor Anqara Rossiyadan tabiiy gaz yetkazib berishdan bosh tortishga qodir emasligini ta’kidladi.
“Tabiiy gazning 50 foizini Rossiyadan olamiz. Biz uchun bu strategik masala va bu strategik munosabatlar. Biz ularni buza olmaymiz”, - dedi Erdog‘an.
Turkiya yetakchisining so‘zlariga ko‘ra, Anqara Finlyandiya va Shvetsiyaning NATOga kirishini qo‘llab-quvvatlamaydi.
“Do‘stlarimizga Finlyandiya va Shvetsiyaning NATOga a’zo bo‘lishiga yo‘q deyishimizni aytdik. Va biz bunga amal qilishda davom etamiz. Terrorchilarni himoya qilgan davlatlarning NATOda bo‘lishiga yo‘l qo‘ymaymiz. Bu davlatlar Kurdiston ishchilar partiyasi va “Xalq himoyasi bo‘linmalari”ning vatani, - dedi Erdo‘g‘an.