TOShKENT, 12-may — Sputnik. Bugun, 12-may kuni Toshkent viloyati Bekobod shahri hokimi Zafar Fayzullayev o‘z lavozimidan ketdi. Bu haqda u Facebook* dagi sahifasida ma’lum qildi.
“Hurmatli hamshaharlar, do‘stlar. Bugun mening Bekobod shahar xokimi sifatida vakolatim yakuniga yetdi. Bu buyuk shaharga rahbar etib tayinlaganlari uchun hurmatli prezidentimiz Shavkat Miromonovichga cheksiz hurmatimni va minnatdorligimni bildiraman. Shu 5-yil davomida hurmatli prezidentimiz doim o‘zlarini mehrlarini Bekobod shahriga va uning mehnatkash aholisiga bildirib keldilar. Qilingan ishlarni sanab chiksak, qog‘ozlar tom-tom bo‘lib ketadi. Men barcha bekobodliklarga o‘zimning hurmatimni bildirib, ularning hayotlariga omad va saodat tilayman. Men ham o‘zimning qo‘limdan kelganicha sizlar bilan ishlab, yashab shu yerning suvini ichib, havosidan nafas olib, tuzini yeb faoliyat ko‘rsatdim. Sizlarning barchangizga sihat-salomatlik, omad tilayman. Yo‘l qo‘ygan kamchiliklarim uchun sizlardan uzr so‘rayman. Xayr!”, - deya yozib qoldirdi hokim.
Ma’lumot uchun, Zafar Fayzullayev 2014-2017 yillarda O‘rtachirchiq tumanidagi “To‘ytepa Zafar mevalari” fermer xo‘jaligini boshqargan. 2001-2011 yillarda esa Yangiyo‘l tuman hokimi lavozimida faoliyat ko‘rsatgan. Turli hududlarda hokim lavozimida 15-yil xizmat qilgan.
* Facebook (Meta) ekstremistik faoliyati uchun Rossiyada ta’qiqlangan ijtimoiy tarmoq.