TOShKENT, 14 apr — Sputnik. Moskva davlat lingvistik universitetida 21-aprel kuni O‘zbek tili va madaniyati markazining tantanali ochilish marosimi bo‘lib o‘tadi. Bu haqda MDH Ijroiya qo‘mitasi matbuot xizmati xabar bermoqda.
Moskvadagi o‘zbek tili va madaniyati markazi nima bilan shug‘ullanadi? MGLU matbuot xizmatining Sputnik O‘zbekiston muxbiriga xabar berishicha, markazda talabalar o‘zbek xalqining tarixi va urf-odatlari bilan tanishadi.
“Markazda MGLU bakalavr va magistrantlari o‘zbek tiliga o‘rgatiladi hamda O‘zbekiston madaniyati bilan yaqindan tanishtiriladi. Alisher Navoiy, Bobur, Abdulla Qodiriy, Abdulla Oripovlar hamda boshqa mumtoz va zamonaviy o‘zbek adabiyoti namoyandalarining asarlarini o‘rganish bo‘yicha qator tadbirlar o‘tkazish rejalashtirilgan”,-deya xabar bermoqda matbuot xizmati.
Ushbu markaz Moskva davlat lingvistik universiteti (MGLU) va O‘zbekiston davlat jahon tillari universiteti (O‘zDJTU) o‘rtasida imzolangan bitim doirasida isha tushadi. Ushbu bitim 1910-yilda imzolangan. Hozirgi kungacha MGLUning siyosatshunos-talabalari o‘zbek tilini ikkinchi chet tili sifatida o‘rganib kelmoqda.
2012 yilda ikki universitet bilan hamkorlikda “Uzbekskiy yazik dlya stran SNG” (MDH mamlakatlari uchun o‘zbek tili) o‘quv qo‘llanmasi nashr etilgan etilgan.
Shuningdek, o‘tgan yili bahorda O‘zDJTUning besh nafar doktoranti MGLUda ilmiy stajirovka o‘tish haqida sertifikat oldi.
MGLU O‘zbekistonning to‘rtta universiteti bilan samarali hamkorlik qilib keladi. Ular O‘zbekiston davlat jahon tillari universiteti, Qarshi davlat universiteti, Samarqand davlat chet tillari universiteti hamda Alisher Navoiy nomidagi Toshkent davlat o‘zbek tili va adabiyoti universiteti.